بالصور والفيديوهات اكتشفت بلاوى عن جوزى واخيرا عرفت السر و كل المستخبى
انا حنان ٣٣ سنة اتجوزت من ١٤ سنة فى بيت عيلة .. معايا ٤ اولاد وبنت .. و كانت حياتى مع جوزى كويسة .. قعدت ١٠ سنين حياتى معاه مستقرة ومفهاش مشاكل .. كنت راضية باللى ربنا كاتبهولى لان جوزى كان على قد حاله و حالته المادية مكنتش بتكفى مصاريفنا. .
و مكنتش معترضة والحمد لله .. ابويا كان مقتدر ماديا وكان على طول وقت ما يلاقينى محتاجة حاجة سواء اكل او فلوس .. كان بيبعتلى اللى ناقصنى عشان مشتكيش لحد غيره ..
لكن بعد ما جوزى قعد من الشغل خالص والحال بقى اصعب بكتير من الاول بقيت اتحرج اطلب من ابويا.. وقتها جوزى اتعرضت عليه شغل برة مصر .. واضطرينا نوافق على الشغل بس مكنش معانا المبلغ اللى يطلع بيه .. المهم وقتها بيعت دهبى و دبرتله المبلغ و اديتهوله عشان يسافر ..
هو بقاله ٦ سنين مسافر و مش هتصدقونى لو قلتلكم فى الست سنين دول منزلش فيهم اجازة غير ١٥ يوم بس .... بعد ما سافر قعد سنة كويس معايا و بيكلمنى حلو .. و الخمس سنين الباقيين جوزى اتقلب وبقى شخص تانى خالص
.. بقى مش طايقنى و مبيكلمنيش الا لو انا كلمته ومبقاش يسال على العيال خالص .. ومبقتش حاجة بتربطنا بيه غير المصاريف بس ..
بعد فترة اتضحلى انه علاقة بواحدة والغريبة بقى ان الواحدة اللى عرفها .. صاحبتى و كان على علاقة بيها من قبل ما يسافر .. برغم ان صاحبتى دى لا عمرى دخلتها بيتى ولا جبتلها سيرة جوزى و كنت هتجنن ازاى قدروا يوصلوا لكده مع بعض ..
و لما سمعت من حد اعرفه كل الكلام ده .. بعد حيرة و تفكير وحزن عيشت فيهم بالايام والليالى قررت اواجه .. و لما واجهته بقى ينكر و يزعق وقالى عايزه تصدقى الناس اللى قالولك صدقيهم مش عايزة تصدقى براحتك و بقى يهمل فيا اكتر و اكتر ..
مبقاش يسال فينا خالص و حتى لما انا اتصل بيه بقى اوقات كتير ميردش عليا .. مبقتش حاسة انى متجوزة خالص و حاولت اصلح كتير ما بينا
وأبدأ ابعتله رسايل حلوة اقول يمكن لما يشوفها يحنلى ويرجع معايا زى الاول .. بس كل ده مجابش معاه اى نتيجة ومكنش بيتجاوب مع اى حاجة ببعتهاله ..
بالعكس بدأ يتجاهلنى تماما وبدأت احس انى مشاعرى واحساسى ميفرقش معاه خالص .. وقتها دخلت اخواته اشهدهم انه بقى مهمل فيا خالص بس بردو مقدروش عليه و رفض اى كلام معاهم ..
بقيت لما اتصل بيه فى اليوم مرة واحدة بس .. ومع ذلك بلاقى الف حجة و حجة منه عشان يقفل بسرعة مرة يقولى عندى شغل و مرة يقولى هتغدا وارجع اكلمك و ينسى وميتصلش تانى ..
بقيت احس انى تقيلة عليه و المكالمة بينا مش بتعدى الدقيقة مع انه فى غربة و بعيد عنى والمفروض انه يشتاقلى بس بقيت احس معاه بعكس كده تماما ...
اهمال لدرجة محدش يتوقعها .. لدرجة انه مش بيرن عليا خالص .. حتى لو قعدت شهر مكلموش هو مش بيكلمنى ولا بيفكر يتصل بيا ..
نفسيتى بقت وحشة جدا .. حتى نفسية ولادى بقوا يزعلوا منه جدا انه مبيسالش عنهم خالص .. احنا حالتنا ما يعلم بيها الا ربنا .. حتى وقت شغله يسمح انه يكلمنى و عنده وقت وانا متأكدة من كده .. لانى عارفة ان الناس اللى ساكنين معاه فى السكن بيكلموا اهاليهم و مهتمين بيهم جدا .. وبيحكولى انه كتير بيبقى فى السكن معاهم و على طول ماسك التليفون فى ايده وبيكلم حد لدرجة انهم افتكروا انه بيكلمنى انا والعيال
بقيت ابعتله فيديوهات دينية و مواعظ و دروس عن حقوق الزوجة عشان يستوعب منها .. بس بردو مفيش اى رد فعل منه .. بقيت اقوله حرام انا مراتك وليا حقوق عليك .. و عشان يقفل معايا بسرعة يقولى حاضر هصلح من نفسى و يقفل ومفيش اى جديد بيحصل منه .. بقيت اقوله لو انت شايف الانسانة اللى انت بتكلمها دى افضل او احسن منى ومناسبة ليك خلاص طلقنى و اتجوزها ... بردو كان بينكر و يزعقلى لما اقوله كده
لحد ما فى يوم زميله فى السكن يبقى قريبى بعتلى صور و فيديوهات هو بيعملها مع البنات ع النت و مبقتش مصدقه ولا مستوعبة ان جوزى ممكن يعمل كده ... وقتها الراجل حكالى على كل حاجة بيعملها .. ومكنش قدامى غير انى ابعت لجوزى الصور والكلام و اساله ...
هو فعلا الصور دى بتاعته ... وقتها اعترف ومقدرش ينكر وقالى ايوه وقالى انها نزوة و طلب منى اسامحه قلتله يا تطلقنى يا تنزل مصر .. قالى مقدرش اطلقك انتى ام عيالى و مش هقدر انزل مصر لان وضع شغلى مش هيسمح اخد اجازة ومقدرش اسيب شغلى خالص لانى معييش اللى يكفى مصاريفكم انتى والعيال لو انتى معاكى اللى يكفينا وتقدرى تمشى البيت انزل .. وابقى جنبكم
سكت و قلت بلاش اكون السبب انى اقطع رزقه وخاصة بعد ما طمنى انها اخر مرة و مش هتتكرر تانى ... وقالى انها كانت مجرد نزوة و ضعف وبقى يتحايل عليا اسامحه ورجع كويس شوية معايا فترة واتقلب تانى ..
بس من اخر مرة طلبت منه باسس وردد الفيس بوك وبقيت ادخل كمان على الواتس بتاعه كمان .. وللاسف من اسبوع اكتشفت انه بيتفرج على افلام مش كويسة ومخلة بالاداب و كمان لسه بيكلم بنات وبيعمل معاهم علاقات على النت مع انه حلفلى انه استحالة يعمل كده تانى .. انا شوفت الفيديوهات والمحادثة و اتصدمت صدمة عمرى ...
بقى انا استحملت كل حاجة حتى السكن فى بيت العيلة ... على امل اننا هنعمل بيت برة ونسكن فيه ويعوضنى اللى فات .. عشان فى الاخر يخوننى و يهمل فيا و يجرحنى بالشكل المهين ده ... انا دلوقت مدمرة نفسيا و حياتى شبة جحيم و حاسة تفكيرى مشلول مش قادرة اتصرف وكل ما اقوله طلقنى يرفض ..
بقيت حيرانه ومش عارفة اعمل ايه فى مشكلتى ياريت تقولولى حل اخرج بيه من الازمة والكارثة اللى انا فيها دى .. انا هتابع التعليقات و الردود يمكن اقدر اوصل معاكم لحل
تعليقات
إرسال تعليق